Maneho di caha y debe

Maneho di caha y debe den gobierno ta estrechamente relaciona cu otro y ta crucial pa un ehecucion eficiente di presupuesto di Pais Aruba. E funcionnan aki ta ser ehecuta na Aruba pa un unidad dentro di Departamento di Finansas, esta Treasury.

E division usual entre Cash Management Unit (CMU) y Debt Management Office (DMO) no ta existi na Aruba. E funcionnan aki a ser uni den un unidad cu tin como meta pa garantisa cu gobierno tin semper suficiente likides pa cumpli cu su obligacionnan completamente y na tempo.

Pa motibo di eficiencia, Pais Aruba a scohe pa un structura organisatorio integra cu ta permiti coordinacion optimal entre maneho di caha y maneho di debe. E metodo aki ta stimula sinergia, ta reduci duplicacion di tarea y ta contribui na un proceso di decision y ehecucion mas fluido.

Pais Aruba tin varios instrumento financiero, cu por wordo dividi den recursonan pa corto plaso y largo plaso. Tanto e instrumento pa maneho di capital operacional regular como e mercado di placa local ta relativamente limita y ta rekeri un coordinacion dinamico cu e sector financiero local.

Mas abou bo por haña documento cu ta duna bista riba structura y desaroyo di debe di Pais Aruba.

Glosario di palabranan

  • Recurso pa corto plaso: Instrumento financiero likido of cu por bira likido rapidamente, cu por ser usa pa maneho di caha den un termino no mas largo cu 12 luna.
  • Recurso pa largo plaso: Instrumento financiero cu por ser usa pa maneho di debe den un termino mas largo cu 12 luna.
  • Maneho di debe (conoci como Debt Management Office (DMO)): DMO ta responsabel pa maneho di debe estatal di un pais. Instrumentonan pa largo plaso, manera bono di gobierno y prestamo bancario, ta central den maneho di debe. Pais Aruba tin un planicacion di 20 aña pa uso di e tipo di instrumento aki.
  • Maneho di caha (conoci como Cash Management Unit (CMU)): CMU ta encarga cu maneho di financiamento pa corto plaso pa cubri scarsedad di likides (conoci como capital operacional). E planificacion ta pa un periodo no mas largo cu un aña.
  • Schema di pago: E riesgo relaciona cu un porcentahe di debe relativamente halto ta ser mitiga pa medio di distribucion optimal di obligacion di pago. Door di parti pagonan den un manera strategico, capacidad pa cumpli cu compromisonan ta ser fortifica y riesgo di (re)financiamento ta ser controla. E plan di pago ta instrumento cu Departamento di Finansas ta usa pa evita acumulacion di pago den un aña specifico.
  • Composicion di debe: Composicion di debe ta refleha cambio dinamico den mercado y direccion strategico di maneho di deuda. E parti aki ta mustra con Departamento di Finansas ta actua proactivamente riba condicionan economico local y internacional, desaroyonan geopolitico y desaroyonan di interes. Door di monitor y integra e factornan aki den maneho di debe, ta trata di logra un structura di debe optimal, eficiente den gasto y consiente di riesgo.
  • Desaroyo di debe: Evolucion di debe estatal durante añanan. E relacion dinamico entre politica di debe y maneho di debe. Esaki ta e relacion entre e decision pa usa debe como instrumento di financiamento pa ehecuta un presupuesto, y na otro banda e decision tocante momento di emision, mercado di capital y instrumento cu ta ser usa.

Documentonan di estadistica di debe pa kwartaal