Ehecucion

E ley di Comptabilidad 1989 (Art. 7 CV 1989) ta e ley mas halto cu ta regarda ehecucion di presupuesto. Ehecucion di e presupuesto ta tuma luga segun e Regeling Centrale Begrotings- en Financiële Administratie (RCBFA) y Regeling Overige Financiële Administratie (ROFA). Ambos regulacion ta crucial pa garantisa cu gastonan di gobierno ta wordo hasi di manera transparente, controlabel y legal. 

RCBFA ta stipula e reglanan principal pa e ciclo financiero completo di gobierno. ROFA ta contene e reglanan practico di ehecucion y ta complementa RCBFA door di describi exacto con e maneho di administracion financiero di e departamentonan di gobierno mester tuma luga. Den practica, esaki ta significa cu e tareanan di ehecucion mester ta regla di tal manera cu pa cada post di presupuesto semper tin bista riba e obligacionnan hasi, derechonan, facturanan, gastonan y recursonan disponibel. Departamento di Finansas ta eherce supervision riba e cumplimento di e reglanan menciona, mientras cu cada hefe di departamento ta obliga pa duna cooperacion y notifica cualkier desviacion na tempo. E resultado di e reglanan aki ta refleha den e rapport di ehecucion (conoci como uitvoeringsrapportage). 

E rapport di ehecucion ta sali for di e Protocol entre Aruba y Hulanda di 2 di mei 2015 y ta legalmente hancra den Landsverordening Aruba financieel toezicht (AB 2015 no. 39 y AB 2023 no. 67). E rapport aki tin como meta pa duna informacion den un manera transparante cu ta duna cuenta na Parlamento di Aruba, Conseho di Minister y Colegio di supervision financiero (CAft). E rapport ta wordo publica cada kwartaal.

Den e rapport ta duna claridad riba:

• gasto di recursonan y gastonan realisa compara cu e presupuesto;
• progreso di proyectonan di inversion (conoci como kapitaaldienst);
• e manera di financiamiento;
• e posicion financiero di e sector colectivo;
• colaboracionnan publico-priva;
• maneho di debe di gobierno;
• e posicion di likides;
• desaroyonan den maneho financiero;
• estado di gasto di personal relaciona cu e norma acorda pa gastonan di personal.

E informacion aki ta contribui na un miho comprension di e maneho financiero y su ehecucion door di Gobierno di Aruba. E rapport di ehecucion ta wordo acompaña pa un resumen cortico den idioma Ingles.