Preparacion

Den e fase di preparacion gobierno ta establece su meta di maneho pa e proximo aña di servicio. E aña di servicio ta igual na un aña calendario. Pa por ehecuta e maneho gubernamental mester otorga fondo pa realisa e actividad- y trabounan necesario. Na e manera aki, e maneho ta sirbi como base pa presupuesto di Pais Aruba. Parlamento ta autorisa gobierno pa ehecuta e maneho incorpora den presupuesto door di duna su aprobacion na e ordenansa nacional pa establece e presupuesto di ministerionan.

Presupuesto di ministerionan ta ser prepara segun e siguiente guia- y reglanan (cu ta scirbi den Hulandes):

  • Capitulo II di Comptabiliteitsverordening 1989 (CV1989);
  • Regeling Centrale Begrotings- en Financiële Administratie (RCBFA);
  • Regeling Overige Financiële Administratie (ROFA);
  • Landsbesluit Openbare Aanbestedingen (LOA).

Documentonan presupuestario entrega na Parlamento prome cu 1 di september: 

  • carta dirigi na Parlamento;
  • concepto di ordenansa nacional pa establece presupuesto di e ministerionan di Pais Aruba;
  • memorandum di splicacion riba e concepto;
  • conseho di Colegio di supervision financiero di Aruba (CAft);
  • conseho di Organo Consultativo (Raad van Advies);
  • rapport (conoci como nader rapport den Hulandes) cual ta contene e respuesta di gobierno riba e coseho di Organo Consultativo.

Contestacion di gobierno riba preguntanan di miembronan di Parlamento y posibel notanan di cambionan tambe ta forma parti di e trayecto aki. Desde 2024 un nota presupuestario ta ser prepara pa duna e ciudadano un miho comprencion di con fondo publico ta ser distribui y usa. Despues cu Parlamento trata y aproba e presupuesto, e ordenansa nacional di e presupuesto di Pais Aruba ta ser formalmente publica den e Gaceta Oficial.

Mas abou bo por haña tur documento (na Hulandes) cu ta forma parti di e concepto di presupuesto y posibel cambio presupuestario.

Fechanan importante

  • Prome (of no mas laat) cu 1 di maart: Tur hefe di departamento mester entrega su calculacion basico di su entrada- y gastonan pa e proximo aña di servicio (ROFA Art. 3).
  • Prome cu 1 di mei: Minister di Finansas ta ricibi e Carta di Mei for di Departamento di Finansas cual ta contene integracion total di calculacionnan basico di ministerionan dentro di e cuadro financiero-economico vigente.
  • Comienso di juli: CAft ta ricibi e concepto di presupuesto pa evaluacion (LAft Art. 10).
  • Medio di juli: E concepto di presupuesto ta bai pa Organo Consultativo (Staatsregeling di Aruba Art. IV.1).
  • Medio di augustus: Ultimo cambionan na e concepto di presupuesto ta tuma lugar a base di consehonan di CAft y di Organo Consultativo.
  • No mas laat cu 1 di september: E concepto di presupuesto pa e proximo aña di servicio ta wordo entrega na Parlamento door di gobierno (Staatsregeling di Aruba Art. V.12).

Glosario di palabranan

  • Concepto di presupuesto: Un presupuesto preliminar cu ta duna un calculacion di ingreso y gasto pa un aña di servicio specifico. E concepto di presupuesto por ser aproba solamente door di Parlamento di Aruba.
  • Nota di cambio: Un documento pa introduci cambio den e proposicion di ley. E nota ta contene e motibo pa e cambionan.
  • Cambio di presupuesto: Un proposicion di ley pa cambia e presupuesto aproba cu ta den ehecucion.
  • Presupuesto aproba: Un concepto di presupuesto cu a ser aproba, cu of sin cambio, door di Parlamento.
  • Nota di primavera (voorjaarsnota): Den e nota aki, durante e prome mita di aña, gobierno ta indica na Parlamento unda den e presupuesto e ta planea pa hasi cambio y con e lo cubri esaki financieramente.
  • Nota di otoño (najaarsnota): Den e nota aki, durante e segundo mita di aña, gobierno ta indica na Parlamento unda den e presupuesto e ta planea pa hasi cambio y con e lo cubri esaki financieramente.
  • Nota presupuestario (begrotingsnota): Un documento di splicacion tocante e concepto di presupuesto cu ta contene desicionnan principal di gobierno pa e proximo aña di servicio. E nota ta un resumen cortico di e producto legislativo, cu ta ser presenta na Parlamento no mas laat cu 1 di september.
  • Reporte adicional (nader rapport): E contestacion di gobierno riba conseho di Organo Consultativo.
  • Nota relaciona cu e relato (nota naar aanleiding van het verslag): Ta contene respuestanan di gobierno na preguntanan di Parlamento riba e concepto of cambio di presupuesto.

Documentonan di presupuesto