FAQ - Preguntanan frecuente
Ki dia mi factura ta wordo paga?
Pago na proveedornan ta tuma lugar segun e condicionnan general pa entrega di producto y servicionan na Pais Aruba. En prinicipio pago lo wordo hasi 90 dia despues di fecha di factura, tanten cu e departamento gubernamental relevante a entrega tur documento cu e aprobacion necesario na Departamento di Finansas.
Pa informacion tocante e condicionnan di compra pa Pais Aruba por referi aki. E documentonan ta na Hulandes.
Dicon mi factura no a wordo paga completo (parcialmente)?
Si for di e administracion di Departamento di Impuesto ta resulta cu Pais Aruba tin demanda di impuesto pendiente for di un proveedor cu su fecha di pago a vence, Departamento di Finansas - por medio di Departamento di Impuesto - lo transferi e montante cu Pais Aruba tin pa paga na e proveedor, te cu e montante di e demanda, na Departamento di Impuesto segun Articulo 10 di Invorderingsverordening. Segun e articulo aki, Departamento di Finansas tambe ta autorisa pa hasi e pago na Departamento di Impuesto riba su mes. Adicionalmente mester wordo menciona cu Departamento di Finansas no tin acceso na e administracion di Departamento di Impuesto y pa e motibo aki no por duna informacion tocante bo impuestonan habri.
Pa informacion tocante e Invorderingsverordening por referi aki. E documento ta na Hulandes.
Kico mi mester hasi pa haya un specificacion di pago for di Departamento di Finansas?
Pa un specificacion di pago bo por tuma contacto cu e unidad Crediteurenadministratie via crediteuren@finance.gov.aw.
Kico ta e manera pa paga un factura di Departamento di Finansas?
Riba bo factura tin e instruccionnan pa hasi un transferencia bancario y/of pa paga cu tarheta di debito na nos loket. No ta posibel pa paga cu placa cash. Pa un areglo di pago, bo por tuma contacto cu e unidad Debiteurenadministratie via debiteuren@finance.gov.aw (of studieleningaruba@finance.gov.aw pa paga bek bo prestamo di estudio (esta Arubalening)). Pa preguntanan tocante e contenido di e cobransa, mester tuma contacto cu e departamento gubernamental relevante.
Ki dia ta paga bijstand (ayudo social)?
Pago di bijstand ta tuma lugar segun e schema di Departamento di Asunto Social.
Pa e schema di pago di bijstand por referi aki.
Ki dia mi ta ricibi mi restitucion di deposito DIMAS?
E termino di pago di cuater (4) luna ta cuminsa ora cu e persona a entrega tur documento na Departamento di Finansas.
Ki dia mi prestamo pa estudio (Arubalening) ta wordo paga?
Departamento di Finansas ta procesa e pago di prestamo pa estudio despues di ricibi e orden di pago for di Departamento di Enseñansa Aruba.
Con mi por paga bek mi prestamo di estudio (Arubalening) y/of pidi un areglo di pago?
Riba bo factura tin e instruccionnan pa hasi un transferencia bancario y/of pa paga cu tarheta di debito na nos loket. No ta posibel pa paga cu placa cash. Pa un areglo di pago, bo por tuma contacto e unidad Debiteurenadministratie via studieleningaruba@finance.gov.aw.
Unda mi por paga mi obligacionnan di impuesto (entre otro BBO, invoerrechten, accijns, impuesto di salario, entrada, ganashi, etc.)?
Departamento di Finansas no ta encarga cu e administracion y cobransa di impuestonan. Pa preguntanan tocante bo impuestonan, por tuma contacto cu Departamento di Impuesto (www.impuesto.aw) y/of Departamento di Aduana (www.douane.aw).