Exitoso finalisacion di prome ronda E-LOFA
Departamento di Finansas a entrega certificadonan na e participantenan cu a finalisa e modulo basico digital di e Leergang Openbare Financiën Aruba (E-LOFA) durante un reunion oficial riba 21 di april 2026.
E prome ronda di e modulo basico E-LOFA a dura for di 1 di december 2025 te cu 6 di maart 2026. E modulo basico ta consisti di dies parti y ta basa riba e material actualisa di enseñansa LOFA. E curso aki ta den idioma Hulandes.
E conversion di e material di enseñansa na un version online ta forma parti di Landspakket Tema A – Maneho Financiero y a wordo finansia pa e Ministerio di Asuntunan Interno y Relacionnan di Reino di Hulanda, cu e meta di fortalece e columna financiero dentro di Pais Aruba.
Un total di 68 participante a finalisa e modulo basico y a ricibi nan certificado. E modulo basico ta destina pa tur hende cu ta involucra den e funcion financiero di Pais Aruba y ta hopi adecua pa e entrenamento di empleadonan nobo den un funcion financiero.
Departamento di Finansas a cuminsa caba cu preparacionnan pa e di dos ronda di e modulo basico y pa un prome ronda di e modulo avansa Cuadro Huridico. Door di digitalisacion di e material di enseñansa LOFA y e ofrecemento di e curso via un plataforma digital, e diferente modulonan por wordo ofreci regularmente. Di e manera aki, empleadonan publico por sigui e curso na nan propio tempo y asina paso pa paso profundisa nan conocemento di finansas publico.
