Emision di fiansa
Pais Aruba tin un portafolio di prestamo cu diferente duracion. E schema di pago ta indica un montante specifico cu cada aña mester ser paga. Aunke Aruba por cubri parti di e obligacion aki autonomamente, otro parti mester wordo refinancia. E necesidad di refinanciamento, conoci como e necesidad di financiamento di Pais Aruba, ta ser autorisa anualmente door di Parlamento via Articulo 2 di e presupuesto di Pais Aruba. E autorisacion ta relaciona principalmente cu refinanciamento di prestamo existente, tanto internacional como local. Pa medio di e metodo sistematico aki, gobierno ta controla y optimalisa su posicion di debe, cu enfoke riba continuidad, likides y eficiencia den gasto.
Necesidad total di financiamento ta ser determina basa riba e balansa presupuestario:
- Un saldo positivo ta reduci e necesidad di financiamento.
- Un deficit ta aumenta e necesidad di financiamento.
Decision tocante e momento di financiamento y escogencia entre mercado di capital local of internacional ta ser inicia riba conseho di Tesorero di Pais Aruba.
Den consideracion ta ser tuma varios factornan, entre otro:
- obligacionnan di pago na inversionistanan;
- necesidad actual y den futuro di likides;
- condicionnan di mercado na nivel local, regional y internacional;
- estado di likides riba diferente mercadonan;
- structura di gasto riba largo plaso;
- implicacionan riba cuenta coriente, cuenta di capital y cuenta financiero di Pais Aruba.
E enfoke integral aki ta pone Pais Aruba den posicion pa actua den manera strategico y responsabel den un panorama financiero dinamico.